Gudmund og Lovise Lien, trolig Sunnylven

[Erling Myrbostad]

Ein slektning av meg, bøkkermeister Gudmund Olson Lien, var fødd 3. Jan 1858 på garden Lia i dåværande Stangvik kommune på Nordmøre. Han fytta til Kristiansund og starta bøkkerverkstad der, og vart da først gift i 1889 med Ingeborg Hansdotter Eidsvaag frå Nesset. Paret hadde ikkje born. Etter at ho døydde i 1902, vart han kjend med Lovise Frøisa frå Sunnylven, f. 8. Mar 1872. Dei gifta seg i Kristiansund 8. Feb 1904. I FT1910 finn vi dei enno i Kristiansund, utan born.

Dei flytta til Geiranger-området eingong før krigen, eg veit ikkje når. Vi finn båe gravlagde på kyrkjegarden på Jogardsbøen i Geiranger. Gudmund døydde i 1941 og Lovise i 1961. Eg lurer på om nokon har nokre opplysningar om dette ekteparet, både om kvar dei bodde, kva dei dreiv med i Geiranger, og om nokon kjenner til om det finns bilete av nokon av dei. Alt av interesse.

mvh Erling

[Paul Frøysedal]

Desse folka var sikkert busette i Sunnylven,då dei er gravlagd på Jogardsbøen,som er Sunnylvsbygda sin nye gravplass. Lovise er frå Endrebruket på Frøysa.Dette er vel ein liten start.
mvh Paul

[Erling Myrbostad]

Takk for opplysningane, Paul. Eg trudde Jogardsbøen var i Geiranger sidan det sto Geiranger kyrkjesokn, men det var altså Sunnylvsbygda. Men vi er fortsatt i Stranda kommune, reknar eg med.

Håpar framleis på at det finns nokon som veit om desse folka, det er ikkje meir enn 50 år sidan Lovise døydde. Eg set svert stor pris på om nokon kan finne ut noko!

mvh Erling

[Paul Frøysedal]

Har fått opplyst frå slektningar i Sunnylven fyljande: Truleg etter att dei vart pensonistar bygde dei seg hus i klyngetunet på Frøysa der dei budde. Dette huset sto ein plass i Endretunet og vart rive når det vart bygt nytt hus på garden.
Dette er alt eg har funne ut.

mvh Paul

[Erling Myrbostad]

Mange takk for forsøket, Paul. Da veit eg i alle fall litt meir.

Skulle nokon huske Gudmund og Lovise, eller ha bilete av dei, set eg pris på at de tek kontakt med ei privat melding eller som eit innlegg her. Grunnen til interessa er at eg samlar opplysningar om alle som har vakse opp på garden her, og mellom desse er Gudmund Lien. Han var søskenbarn til bestefar min, og ein god ven av han. Desverre døydde bestefar min tidleg, og etterkomarane mista kontakten.

Beste helsing Erling